Интервјуата на МСФ ги продолжуваме со Габриел Ба, еден од најталентираните стрип цртачи во светот денес. Кај нас (а и во светот) е познат со неговиот (сега веќе серијал) стрип "Umbrella academy". Овој стрип на кој што работеше со Џерард Веј (Gerard Way, пејач на групата My Chemical Romance) ги доби сите позначајни награди во светот на стрипот, заклучно со наградата Ајзнер (Eisner award). Има брат близнак Фабио Мун (кој е исто илустратор) со кој соработува на нивниот авторски стрип "Casanova" (заедно со Matt Fraction). Со голема чест ви го претставувам краткото интервју со Габриел:




МСФ: Кажи ни’ нешто повеќе за тебе, каде си роден, училиште исл? Како дојде до ова што си сега?
Габриел Ба: Имам 33 години, роден сум во Сао Паоло, најголемиот град во Бразил, каде што и денес живеам. Дипломирав на факултетот за ликовни уметности и ја имам работено скоро секоја работа поврзана со цртањето. Правев илустрации за магазини и весници, сторибордови за филмови и реклами, карикатури за настани…
Започнав со издавање фанзини (фотокопирани мини-стрипови) во средината на 90-тите во Бразил, заедно со мојот брат близнак Фабио Мун (Fabio Moon) и од тогаш немаме прекинато со раскажување нови приказни и издавање нови книги.
Мојата прва издадена работа во Америка беше мини-серијалот „Roland: Days of Wrath“, напишан од Шејн Амаја и нацртан со заеднички сили со брат ми. Одам секоја година на Комик Кон во Сан Диего, Калифорнија, да ја покажам мојата работа, да запознаам нови автори, уредници и секако публиката.





МСФ: Каков е твојот вообичаен работен ден, од будење до легнување?
ГБ: Се будам околу 8 часот и започнувам со работење околу 10. Работам до вечер, 9-10 часот, вечерам и најчесто одма заспивам. Работам и за викенди и празници, но тогаш гледам да се помалку саати посветени на работа. Вообичаено сработувам од една до три страници на ден.

МСФ: Може да ни кажеш на што си работел до сега (освен Umbrella Аcademy и Casanova)?
ГБ: Имам серијал на книги (албуми?) објавени во Бразил, наречени „10 Paezinhos“, сите заедно со брат ми како ко-креатор. Секое издание раскажува различна приказна. Во САД, ние (јас и брат ми) ја објавивме „URSULA“ во 2004, со AiT/Planet Lar, како и “De:TALES“ преку Дарк Хорс. Ние сами го издадовме и “ROCK'N'ROLL“ во 2004 г. (со Како и Бруно ДиАнџело) и „5“ во 2007 (со Becky Cloonan, Vasilis Lolos и Rafael Grampa), кое освои Ајзнер награда за најдобра Антологија.





МСФ: Кои техники ги користиш, софтвер, хардвер, водени боици, креони, дигитално/рачно… Малку за твојот работен процес?
ГБ: Јас сакам црно-бела уметност, па откако ќе ги завршам моите табли со молив, за туширање користам МИКРОН (MICRON disposable pens) и Штедлер (STAEDTLER Pigment Liner) фломастери. Кога треба да ги бојам моите работи, ги скенирам и го правам тоа во Фотошоп.

МСФ: На што работиш во моментов (ако не е тајна)?
ГБ: Пишувам и цртам нов серијал со брат ми наречен „Daytripper“, за издавачот Вертиго.
(Daytripper веќе е почнат со издавање, три броја се излезени досега од вкупно десет - н.з.)

МСФ: Како започна твојата соработка со Gerard Way?
ГБ: Скот Али, нашиот уредник во Дарк Хорс, ме покани да бидам цртач на нов проект, кој го имаше во 2006 г. Ми ја прати идејата и некои почетни скици, па откако малку подразмислив се согласив да работам. Тој проект беше Umbrella Academy, па две недели покасно се запознав со Џерард за време на Комик Кон, но започнавме со работа на серијалот дури 7 месеци подоцна.





МСФ: Некои автори кои те инспирираат?
ГБ: Laerte Coutinho (Бразил), Eduardo Risso (Аргентина), Mike Mignola, Frank Miller, Jeff Smith (Америка) и Sergio Toppi (Италија)

МСФ: Кој дел од работењето на стрипови е најлесен а кој најтежок за тебе?
ГБ: Се изгледа лесно кога работиш нешто што го сакаш, па што повеќе го сакам проектот на кој работам, толку полесно ми е за работа. Најтежок дел ми е кога треба да работам на различни проекти во исто време, затоа што не можам да се фокусирам на никој како што треба.

МСФ: Твоја омилена тема за работа?
ГБ: Би рекол врски, човечки односи…





МСФ: На кој карактер би сакал да работиш?
ГБ: Сакам кога креирам нови карактери за секоја приказна. Не сакам да цртам карактери на кои што сум фан.

МСФ: Дали уште имаш време за читање стрипови и кои ти се омилени овој период?
ГБ: Читам многу малку стрипови сега. Само што го дочитав Asterios Polyp на David Mazzucchelli и беше одличен!

МСФ: Некои совети за македонските автори?
ГБ: Работете нешто што го сакате. Останатото ќе си дојде со време.

МСФ: Кој е подобар автор, ти или брат ти?
ГБ: Не постои нешто такво.





МСФ: Филм Umbrella Аcademy? Дали е можно такво нешто за во иднина?
ГБ: Постои сценарио и мислам дека сега бараат режисер. После тоа, можеме да кажеме дека реализацијата на филмот ќе стане реалност.


Габриел Ба го гњавеше: ТхеМичо
Гњавењето го преведе: Растаман
Дополнителни корекции: Тет0еЦ


Повеќе за работата на Габриел Ба и неговиот брат Фабио Мун на нивниот сајт: