Иако имав читано нешто малку од овој стрип јунак, никогаш му се немав посветено целосно како на X-Men или на Batman. За среќа деновиве тоа се смени, и можам да кажам дека корегирав една од најголемите сопствени грешки кога се во прашање стриповите. "Usagi Yojimbo" e авторскиот стрип на Stan Sakai, кој ја раскажува сагата за ронинот самураj Miyamoto Usagi, сместена во почетокот на 17ти век, во феудална Јапонија, во периодот во кој Шогунот ја унифицирал државата и со цврста рака ги држел малите кнежества заедно. Тука доаѓа најсимпатичниот аспект на приказната, односно фактот што сите ликови во стрипот се животни. Верверички, змии, мачки, носорози, а самиот Usagi е зајак. Дури и неговото име во буквален превод значи Зајак-Телохранител.
"Usagi Yojimbo" својата премиера ја доживува како ревијален краток стрип во едицијата "Albedo Anthropomorphics" односно подоцна во едицијата "Criters". Тоа се случува во 1984та, истата година кога Kevin Eastman и Peter Laird на голема врата доживуваат успех со огромниот независен стрип-хит "Teenage Mutant Ninja Turtles". Приказната на 10 страни "The Gobilin of Adachigahara" е високо оценета и од критиката и од публиката. Карактеристичниот цртеж на Sakai, црно-белиот формат и преубавото, живописно прикажување на феудална Јапонија е хит кај читателите. После само неколку кратки приказни, Sakai склучува договор со издавачката куќа "Fantagraphics Books" и Usagi добива свој сопствен серијал. По 38 броја Sakai (инаку целосен сопственик на брендот), се сели кај своите пријатели Eastman и Laird во "Mirage Comics" каде Usagi го добива својот втор серијал од 16 броја. Во овој период доживува неколку crossover стрипа со UsagiNinja Turtles или поточно со желката чиј карактер најмногу одговара на оној на Usagi, Leonardo. Со опаѓањето на популарноста на "TMNT" а со тоа и на црно белиот независен стрип, "Mirage" губи интерес во публикување на понатаму па "Usagi"Sakai се сели повторно во алтернативна издавачка куќа, овој пат една која е во подем - "Dark Horse". Соработката е плодна и "Usagi Yojimbo" останува дел на семејството стрипови на "Dark Horse" се до денес, и е рамо до рамо во продажба со "Hellboy" и "Star Wars". Неговите авантури се реиздадени во колекционерски книги (досега 20ина на број).
За оние кои сакаат да знаат нешто малку за стрипот но доволно за да не им биде расипано задоволството ако решат да го читаат, еве мое кратко интро по прочитани 6 тома. Miyamoto Usagi е самурај-ронин, бивш заштитник на загинат господар, сега принуден да талка низ земјата и да заработува за да преживее. На своите патувања тој се среќава со разни интересни ликови како што е ронинот ловец на уцени Gen, младиот лорд Noriyuki и убавата самурајка Tomoe Ame. Низ авантурите на Usagi, Sakai всушност на одличен начин ни прикажува голем дел од јапонскиот фолклор, нивните традиции, обичаи, верувања, па дури оживува и многу суштества карактеристични за тој дел од светот. Како син на кметот во своето село, Usagi, заминува да биде ученик и заштитник на кодот на bushido-то под големиот мајстор Katsuchi, кој бунтувал против осумте стила на борба и создал свој стил. Свесен за своите должности Usagi ја одбира честа пред своите лични задоволства и пред оние кои му значат во животот. Една од тие личности е и неговата сакана од детството Mariko, која е сега мажена со Kenichi, некогашен другар на Usagi а сега негов ривал. Иако целата приказна на почетокот делува едноставна па дури и наивна, како расте бројот на изданијата така се продлабочува и содржината, минатото на ликовите, како главните така и епизодните, а се развива и долга приказна која е во позадината и која раскажува за желбата за доминација на лордот Hikiji и неговиоте бројни платеници во нинџа клановите.
"Usagi Yojimbo" е моја апсолутна препорака за секој кој се смета себе за љубител на стрипот. Ова е веројатно еден од најквалитетните производи на американскиот пазар во моментов.
